- 2019-12-16 19:01:41
- ព័ត៌មាន
ទីបំផុតឈីប Snapdragon 865 អាចប្រជែងនឹងឈីប A13 របស់ Apple បានហើយ!
- 2019-12-16 19:01:41
- ចំនួនមតិ 0 | ចំនួនចែករំលែក 0
ទីបំផុតឈីប Snapdragon 865 អាចប្រជែងនឹងឈីប A13 របស់ Apple បានហើយ!
ចន្លោះមិនឃើញ
Samsung, Huawei និង MediaTek សុទ្ធតែជាក្រុមហ៊ុនអាចផលិតបន្ទះឈីបកម្លាំងខ្លាំងសម្រាប់ប្រើលើឧបករណ៍ Android។ យ៉ាងណាក្ដីបើមើលលើសមត្ថភាពនៃដំណើរការ គូប្រជែងប្រកៀកប្រកិតខ្លាំងបំផុតរបស់ Apple គឺតែងតែជា Qualcomm ជាមួយបន្ទះឈីប Snapdragon របស់ខ្លួន។
ក្រុមការងារ Android Authority បានប្រើប្រាស់កម្មវិធីធ្វើតេស្តសមត្ថភាពដំណើរការស្មាតហ្វូនឈ្មោះថា Speed Test G ដែលរកឃើញថាឈីប Snapdragon 855 គឺមានសមត្ថភាពស្រដៀងនឹងឈីប Apple A11 ដែលប្រើលើ iPhone 8។ ប៉ុន្តែបើប្រៀបនឹងឈីប A13 លើត្រកូល iPhone 11 ឃើញថាឈីប Snapdragon 855 យឺតជាង ២៥%។
ប៉ុន្តែគ្រប់យ៉ាងនឹងត្រូវផ្លាស់ប្ដូរ។ មានរឿងសំខាន់ពីរដែលកើតឡើងនៅឆ្នាំនេះ។ ទីមួយគឺការកើនឡើងនៃសមត្ថភាពរបស់ឈីប A12 និង A13 គឺមានមិនដល់ ៥% នោះឡើយ។ នេះបើតាមការធ្វើតេស្តលើ Speed Test G។ ទីពីរ ឈីប Snapdragon 865 មានការកើនឡើងសមត្ថភាពខ្លាំងជាងមុន ២០% បើធៀបនឹង Snapdragon 855។ ការកើនឡើងតិចតួចរបស់ឈីប Apple និងការកើនឡើងខ្លាំងរបស់ឈីប Qualcomm មានន័យថាឈីបទាំងពីរចាប់ផ្ដើមប្រកួតប្រជែងគ្នានៅក្នុងកម្រិតតែមួយ។
Qualcomm បានប្រកាសចេញ Snapdragon 865 កាលពីដើមខែធ្នូ ហើយក្រោយមកក្រុមហ៊ុនអនុញ្ញាតឲ្យអ្នកសារព័ត៌មានធ្វើតេស្តកម្លាំង 865 ដោយប្រើប្រាស់ Qualcomm Reference Device (QRD)។ QRD គឺជាស្មាតហ្វូន Prototype មួយ ដែល Qualcomm ផលិតឡើងសម្រាប់ការធ្វើតេស្ត។
ការធ្វើតេស្តលើផ្នែក CPU ជាមួយកម្មវិធី Speed Test G បង្ហាញថា QRD អាចបញ្ចប់ការធ្វើតេស្តដោយប្រើពេល ៣៦,៦ វិនាទី។ ចំណែកការធ្វើតេស្តដូចគ្នានេះនៅលើ iPhone 11 Pro Max គឺបញ្ចប់ដោយប្រើពេល ៤០ វិនាទី។ នេះបង្ហាញថាឈីប 865 ប្រសើរជាងឈីប A13 ប្រមាណ ៨%។
ចំណែកការធ្វើតេស្តលើ GPU វិញ ឈីប A13 នៅតែមិនអាចត្រូវគេផ្ដួលបាន។ iPhone 11 Pro Max បញ្ចប់ការធ្វើតេស្ត 3D Unity ក្នុងពេល ១៤,៥ វិនាទី ចំណែក QRD វិញប្រើពេល ១៦,៩ វិនាទី។ យ៉ាងណាក្ដីកម្រិត Resolution នៃអេក្រង់គឺជាកត្តាមានឥទ្ធិពលមួយ។ QRD មានកម្រិត Resolution ១៤៤០x២៨៨០ ចំណែក iPhone មានត្រឹម ១២៤២x២៦៨៨។ ដូចនេះ QRD ត្រូវធ្វើការខ្លាំងជាង។
សម្រាប់ការធ្វើតេស្តលើ Geekbench 5 វិញ QRD ទទួលបាន ៩៣៥ ពិន្ទុលើដំណើរការ Single-Core ចំណែក iPhone 11 ទទួលបាន ១៣៣០ ពិន្ទុ។ ឯការធ្វើតេស្តដំណើរការ Multi-Core ឃើញថា SD 865 បានពិន្ទុ ៣៤៥០ និង iPhone 11 បាន ៣៤៨០ ពិន្ទុ ដែលប្រកៀកប្រកិតគ្នាខ្លាំងបំផុត។
យ៉ាងណាក្ដីការធ្វើតេស្តដោយប្រើ AnTuTu 8 វិញ គឺទទួលបានលទ្ធផលខុសគ្នា។ QRD បានពិន្ទុសរុប ៥៤៥ ០០០ ពិន្ទុ ចំណែក iPhone 11 Pro Max បានពិន្ទុប្រមាណ ៥០៦ ១០០។ ប៉ុន្តែគេធ្លាប់ឃើញ iPhone 11 Pro Max បានពិន្ទុខ្ពស់ជាងនេះ ហើយបើតាមចំណាត់ថ្នាក់ផ្លូវការដែលចុះផ្សាយដោយ AnTuTu ឃើញថា iPhone 11 Pro Max មានពិន្ទុ ៥៤៩ ៧១៧ ឯណោះ ធ្វើឲ្យលទ្ធផលកាន់តែកៀកគ្នា៕
ចុចអាន ៖ Apple ទិញបានក្រុមហ៊ុនមួយ នឹងជួយឲ្យ iPhone ថតរូបបានកាន់តែខ្លាំង
